Deyirəm, gəl qapı dalından kimisə püsaq. Bunun adını qulaqfalı qoyarıq,
belə yaxşı səslənir. Bilirəm, bilirəm, siz də bunu çox sevirsiz! Məşədi
İbad filmindəki yengə kimi əllərimizi dalımızda cütləyib əyilək və ləzzətlə
burnumuzu başqasının işinə soxaq…
Xeyr, ayıb-zad deyil! Əgər ayıbdısa qonşunuz sizə qeybət eləmyə gələndə
ağzındlan vurun, qaytarın. Sarı mətbuatı və şou xəbərləri oxumayın,
onun bunun dediyini fakt kimi qəbul eləyib yaymayın. Sizdə alınsa gəlin
üzümə dayanın ki, düz eləmirsən. Onda mən bu köşəmin izlərini nəinki
internetdən, hətta kompüterimin yaddaşından silərəm.
Biz şaiyələr inanmasaq, qeybət eləməsək heç olmur e… Elə şeylər var
ki, onu kitablarda yazmırlar, danışanda isə bir əlləriylə ağızlarını
qapayırlar ki, dodaqların tərpənişindən heç kim duyuq düşməsin. Məsələn,
əfsanəvi Misir çariçası Kleopatra deyilənə görə balacaboy və gömbul
qadın imiş. Onun kifirliyini pıçhapıçla bizim günlərə qədər çatdıranlar
üstəlik deyir ki, kişilərin ağlını başından ona görə qoparırmış ki,
paryümeriya və ətirlərdən bacarıqla istifadə edirmiş. Əlbəttə, mənə
də inandırıcı gəlmir. Yəni o boyda Roma imperiyasının Sezarının arvadı
özünə abırlı bir ətir ala bilməmişdi?
Ya da ki, Napoleonun Jozefinasını götürək. Napoleonun onunçün ürəyi
gedirmiş demək bir yana, ərə gələndə bösböyük uşaqlarını yanına salıb
gəlməsinə də göz yumaq. Napoleondan yaşca çox böyük olmağı da problem
deyil. Amma onun üstəlik iki qabaq dişləri də yox imiş. Mırıqdişli imperatriça
olar, özü də lap görsənən yerdə?
2-ci Aleksandra bomba tullamış terrorist Qrenivitski həyatda çox yumşaq,
dostcanlı adam olub. Ona görə hamı onu «Kotik» (yəni pişik) çağırırmış.
Ciddi yazıçı kimi ad çıxarmış Lev Tolstoyun isə axmaq və yüncül komediyalara,
vodevillərə baxmaqçün ürəyi gedirmiş. Ordan çıxandan sonra isə heç də
evə tələsmirmiş, sonacan qalıb aktrisalarla tanışlıq, ünsiyyət yaradırmış.
Amerika prezidenti Bencamin Franklin quldarlığa qarşı mübariz olsa da
evində bir-iki düjün qara qullar saxlamaq adətini tərgitməmişdi. Bu
işə burnunu soxanlara isə deyirdi ki, evdəki qadını və qızları öz paltarlarının
ilməsini bir-birinə keçirməkdə o qədər acizdirlər ki, bu boyda qulluqçu
saxlamağa məcburdur. Məşhur komik Benni hill isə həyatda qaraqabaq və
adamayovuşmaz olub. Onun bir dənə də dostu yox imiş, çünki heç kim onunla
ünsiyətə dözə bilmirmiş.
Bakirə kraliça imicini yaratmış Yelizaveta Tüdorun məşuqlarını dənə
ilə yox, dəstəylə ölçürdülər. Düzdü, ömrünün sonuna kimi o, ərə getmədi.
Multfilmlər kralı Uolt Disney isə siçanlardan dəhşətli dərəcədə qorxurdu.
Mikki Mausun yaradıcısı bir dəfə siçanla üzbəüz çıxanda qadın kimi qiyyə
çəkərək yaxınlıqdakı kətilin üstünə dırmaşmışdı. Təsvvür edirsiz, hamının
gözü qarşısında.
Bu siyahıda reputasiyasını ən çox Ceyn Fonda korlayıb. O, orqanizmin
bərkidilməsi, kamilləşdirilməsi və sağlam həyat tərzinin dünya səviyyəli
carçısı kimi ad çıxarsa da özü tiryək çəkir, güclü təsirli dərmanlar
qəbul edirdi. Eyni zamanda anoreksiya və bulimiya xəstəliklərindən əziyyət
çəkirdi. O deyirdi ki, kosmetik cərrahiyyəyə qarşıdır. Amma özü göz
yarıqlarını böyütmüş və döşlərinin implantasiyasını da eləmişdi. Dünyanın
kapilistlərini və əyyaşlıq eləyən milyonerlərini tənqid eləyən xanımın
100 min dollardan artıq varidatı vardı.
Ona görə də xalqım, kitab və qəzet oxumaq adətindən düzgün eləyib, əl
çəkmisən. Nə düzünü deyəcəklər, nə də yazacaqlar. Elə el adətiylə pıçhapıç
eləməyində ol. El abəti demiş, yuxarıda yazılanlara el içində ikiüzlülük
də deyirlər. Üzdən nə istəyirlər bilmirəm. İrad tutmağa dursan, gərək
mədənin üzünü mürdəşir kimi danlıyasan. Axı hər iki həftədən bir qabığını
dəyişir ki, öz-özünü həzm eləməsin. Heç gör ona ikiüzlü deyən var? Necə
deyərlər, «Qarın başdan irəlidir»…
