Çmok-çmok, maç-maç, quc-quc

Yazının nə erotikaya, nə də Brilyant xanımın şəstlə müəlliflik hüququnu müdafiə etdiyi mahnısına dəxli var. Sadəcə Allahın başımıza yendirdiyi isti günlərin birində bayıra çıxmalı olmuşdum. Normal xanımların evdə bozbaş bişirib kondisioner altında sərinləşdiyi vaxt mən notarial kantorun isti otağında bir dəstə kişiylə (eləcə də bir dəstə qadınla) tər tökürdüm. İnanın mənə, təsvir etdəcəyim səhnə kütləvi sevişmə səhnəsi deyildi…
Bu da bir adi haldı, kişilər qadınlarla bir-birinə sığınıb növbəyə dayanmalı olur. Belə növbələrdə cinsi əlamətlər o qədər tez yoxa çıxır ki, kimin kişi, kimin qadın olduğunu ayırmaq çətinləşir. Əgər 2 kvadrat metrlik gözləmə zalında adamların sayı kritik həddə çatıb 30 nəfəri keçindən sonra dava-dalaş baş qaldırmasaydı yəqin ki, nə arxamda, nə də qarşımdakının cinsi məni maraqlandırmazdı. Zahiri görünüşündən kişiyə daha çox bənzəyən birisi kişilərlə qadınların növbəsini ayırmağı təklif elədi. Deyəsən, ona iki nəfərin yerini tutan kök qadınlarla bir növbədə dayanıb cırhacırda tərli insan ətinə sürtünmək sərf eləmirdi. Bir də ki, növbədə 5 kişiyə azı 15 qadın düşürdü. Ona görə də kişi və qadın növbəsini ayırmaq təklifi kişinin dilindən səsləndi.
Nəsə inanmağım gəlmir ki, belə bir bashabas, özü də dövlət idarəsində başqa ölkələrdə olmuş ola. Müsəlman ölkələrinin adətləri belə kütləvi orgiya səhnələrini yaratmağı haram bilir. Bəlkə Afrika xalqlarının ən geridə qalmış qəbilələrində belə şəraitə düşəsi olsan növbədən kimsə basıb səni öpə bilər. Amma yenə də bəlkə deyirəm. Qaradərilərin mənəvi bönövrələrindən xəbərim yox, ona görə də fikir yürüdə bilmərəm. Yəqin ki, hər xalqın da öz öpüşmə mədəniyyəti var.
Sevgili olmayanların öpüşməsini sosial öpüş adlandırırlar. Yəni ki, hər xalq bir cür öpüşür və bu qaydaları bilməsən gülünc vəziyyətə düşə bilərsən. Məsələn, Avstriyada görüşəndə hər iki yanaqdan öpmək lazımdı. Bizdə türk seriallarına aludə olmuş ev xanımları da indi bu sayaq, yəni hər iki yanaqdan öpərək görüşür. Yəqin bundan sonra özlərini bir növ müasirləşmiş kimi duyurlar. Almanlar yalnız yaxınlarıyla öpüşür, qalanlarının əlini sıxmaqla kifayətlənirlər. İngilislərsə daha soyuqdu, öpüşü başını yellətməklə əvəzləyirlər. Hollandiyada görüşəndə əvvəl sağ, sonra sol, axırda isə yenə də sağ yanaqdan öpürlər. Ən sevimli qonağın payına isə lap çox öpüş düşür. Öpüş nə qədər çox olarsa qonaq o qədər sevimli sayılır. İspanlar lap çox öpüşcüldü. Bir balaca tanıdığı adamı basıb öpürlər. Onun yaxınlığındakı adamlar da, qohumları da risk zonasında olur. Özü də hər yerdə, işdə də, lap mağazada da öpüşürlər. Fransızlar da çox öpüşəndi. Ümumiyyətlə Avropa ölkələrinin əksəriyyətində hər iki yanaqdan öpürlər. Fransızlarsa 2 dəfə artıq, yəni 4 dəfə öpüşüb hər iki yanağı öpüşlərə qərq edirlər. Yəqin ki, bayaq təsvir etdiyim növbəyə heç olmasa bir fransız düşsəydi bizim kişilərin deyinməyi əvəzinə bütün qadınları, həm də bütün kişiləri öpücüklərə qərq edərdi.
Yaponiya, Çin, Koreya və başqa şərq ölkələrində hər şey əksinədir. Yəni ki, ictimai yerlərdə öpüşmək, hansısa hisslərini sərgiləmək qəbul edilməyib. Yapon öpüşü adı altında tanınan öpüş belədi: bir-birinə baş əyəndən sonra dodaqları daha da bir-birinə sıxıb sanki oğurluq edirmiş kimi, kiminsə görməyindən narahat olurmuş kimi bir anlıq başqasının yanağına toxunmaq. Hindistanda da öpüşməyi sevmirlər. Burada hesab edilir ki, tüpürcəklə birgə insanlar öpüşəndə ruhlarını da mübadilə edir. Əfqanıstanda kiminsə yanaqdan öpdüyünü görməzsən. Hərdən kişilər sol yanaqdan başlayan üsqat öpüşlə bir-birini salamlayır. Amma əfqan qadınını küçədə kimsəylə öpüşməyə heç nə məcbur edə bilməz. İtalyanlar sevgidə ad çıxarsalar da yalnız çox yaxın adamlarını öpürlər, yerdə qalanı ilə qucaqlaşırlar. Ən maraqlı öpüş tərzi eskimoslarındı. Onlar şaxtada dillərini donmaqdan qorumaq üçün yalnız burunlarını bir-birinə sürtürlər. Kiprikləri də tez-tez əsdirmək olar.
Notarius idarəsinni dar gözləmə salonunda hamı bir-birinə sığınsa da öpüşmək kimsənin ağlına gəlməzdi. Özü də ağsaqqal kişilər ağbirçək qadınlarla dava salan vaxt cavan oğlanlar yavaş-yavaş növbədən çıxıb harasa gedirdilər. Təcrübəsizlikdən onların səbirsizlik edib getdiyini düşündüm. Amma sən demə cavanlar haqqın yolunu tez tapırlar. Onlar salona keçib orda vasitəçilik edən cavad oğlana 1-2 manat artıq verib kağızlarını növbədənkənar təsdiqlətdirdilər. Bəlkə də işini bizdən tez həll edib çıxanda başı bir-birinin ətini didməklə məşğul olan bizlərə ovcunun içindən qaynar bir öpücük də göndəriblər. Bax bu, artıq bizim milli öpüş üsulumuzdu.