Günəşdən, bozbaşdan və azadlıqdan bezəndə

Yayı da yola verdik, amma istirahət barədə fikirlər rahat buraxmır. Yəqin əsil istirahətin görənlər bilər, biz bilmərik. Həkimlərə qulaq assan deyəcəklər ki, həmişəki şəraiti tamam başqa vəziyyətə dəyişdirməsən razılıq hissi tapmayacaqsan. İsti də imkan vermədi ki, bir gözümüzü açaq. Həmin məntiqlə biz, ilin 8 ayını gözümüzü günəşdən qorumaqçün qıyıb gəzərək yaşadığımızdan əsil istirahətin dadına baxmaqçün soyuq, ya da heç olmasa sərin yerə getməliyik. Onda bəlkə donmuş tayqanın şaxtası bizim istimizi çıxarıb rahatlıq verər.
İstirahət barədə fikirlər nədənsə marşrut taksidə kilkə kimi bir-birinə qısılıb gedəndə lap beynimə hakim kəsilir. Başımı yanımdakı kişinin qasığına məcburən söykəyib xəyallara dalanda (başqa imkan yox idi, başımı tərpətsəydim yuxarıdan başımın üstündə Damokl qılıncı kimi asılmış setkadan damcı gəlib düz təpəmin ortasna düşücəkdi) hardasa sərin və yaxşı qoxuyan bir məkanın olduğunu fikirləşmək rahatlıq gətirir.
Nə olsun ki, üzü qışa gedirik, bütün dünyanın bu vecinə deyil, öz istirahətindədi. (Bakıda isə qış gəlməmiş marşrutda bütün şüşələri niyə mıxlayırlar, bilmirəm) Hər qış İsveçrədə Yukkasyarvi şəhərciyi yaxınlığında (şimal qütbündən 200 km aralı) buzdan mehmanxana düzəldirlər. Hər il dizaynerlər və inşaatçılar ayrı-ayrı olduğundan otel də fərqli olur. 20 il əvvəl 60 kvadratlıq yer tutan bu otel indi 5500 kvadrata güclə sığır. İçəridə mənfi 5-10 dərəcə isə daimidir. Ona görə də bura gələnlər bir gündən artıq qala bilmir. Maral dərisi və küknar budaqlarıyla döşənmiş çarpayıda, yataq kisələrində gecələyənlər səhər gözünü açan kimi qlintveyni düz yataqlarına gətirirlər. Qonaqlar gününü buzdan yonulmuş barın ətrafında araqla qızınmaqda keçirirlər. Bizimçün hələ də gec deyil, çünki otel dekabrdan aprelə qədər işləyir.
Günəşdən, bozbaşdan, və azadlıqdan bezmisizsə Avstraliyaya gedin. Maunt Qambye adlı şəhərciyindəki mehmanxana 1866-dan 1995-ci ilə qədər türmə kimi fəaliyyət göstərirdi. Bura çox vaxt qatilləri və zorakılar salırdılar. İndi isə cəmi 99 nəfərə çatacaq bu mehmanxanada küknar yonqarı və pambıqdan olan döşəkləri otelin sahibi özü sırıyır. Turistlər 2 nəfərlik, 4 nəfərlik, 10 nəfərlik kamera seçə, ya da bütün dünyadan qaçıb birnəfərlik kamerada gizlənə bilərlər. Bura qalmağa yox, gəzməyə gəlirlər. Amma istəsələr otelin sahibi 66 avstraliya dollarına bir nəfərlik, 45 dollara isə ikinəfərlik nömrədə burada gecələməyə icazə verər. Qalanlar yeməyi özü bişirməli olur.
Avsriyanın Ottensxaym şəhərindəki Dasparkhotel isə kanalizasiya borusunun içində quraşdırılıb. Kanalizasiya çəkərkən istifadə edilən enli borularda iki nəfərlik yataq, yun xalça, şkaf, hətta elektrik də var. Burada istirahət etmək istəyənlərə yaxınlıqda yerləşən tualetlərin, kafe, restoranların göstərildiyi xəritəni hədiyyə verirlər. Amma bahacıl da deyillər. Qonaq lazım bildiyi qədər pul ödəsə də kimsənin cınqırı çıxmır.
Bəzən adam rahat evində də özünü barabanı mənasızcasına fırladan siçan kimi his edir. Amma bu cür yaşamağı arzulayanlar da varmış. Fransada Nant şəhərciyində açılmış «Dağsiçanı» adlı mehmanxanada cəmi 16 kvadratlıq ərazidə özünüzü əsil siçan kimi hiss edə bilcəksiz. 18-ci əsrin binasının bir küncündə yerləşən mehmanxanada gecəsi 99 avroya hələ ki, qalmaq olar. Çünki sahibləri qiyməti 150 avroya qədər qaldırmaq fikrindədi. Yəqin müştərləri də var. Ekstrimal turist otağına havada asılı qalmış paslı pilləkənlə qalxa bilər. Burda taxıl anbarı və paslı boçkada içməli su da var. Mehmanxana sahibləri fəxr edir ki, qonaqlara əsil ləzzət, yəni 2 metr diametrli çarxda qaçmağı təklf edə bilirlər. Qonaq ayağını içəri basan kimi onlara məcburən siçan paltarı geydirib çarxı fırlatmağı məcbur edirlər. Burda duş, hətta mətbəx də var. Deyirlər tezliklə «Wi-Fi» olacaq. Həmin dizaynerlər indi başqa bir layihə üzərində işləyir. Onlar ana bətnini imitasiya edən otel açmaq fikrindədəir. Burda yumşaq, rahat olacaq və həlim səslər gələcək.
Almaniyada «Propeller Island City Lodge» otelində yatanda şüşə tabutun (yəni çarpayının) qapağını çırpmamağı məsləhət bilirlər. Tabutda yatmaq ləzzətinə görə qonaq 69-150 avro arası pul ödəməli olur. O, tabutu istəməsə qəzet yapışdırılmış otağı, ya da qədimi balıqqulağının içində yatmağı seçə bilər. Deyirlər ki, bir pəncərəli narıncı otağı otelin sahibi heç kimə vermir. O, enli pəncərəyə darmışıb orda yatmağı çox xoşlayır.
Arvadının kirli önlüyündən və kişi xorultusundan bezənləri də unutmayıblar. Yamaykadakı «Hedonizm» nudist mehmanxanaları dünyada ən yaxşılarından sayılır. Burda nəinki çılpaq gəzmək hətta qulluqçunun gündəyməzində çimdik də qoparmaq olar. 11 kilometrlik boş çimərlikdə o baş, bu başa çılpaq qaçandan sonra halın qalsa o biri otaqların sakinləriylə «ünsiyyət» qurmaq olar. Kütləvi orqiyalar burda rəğbətlə qarşılanır. Yaxşı ki, bura uşaqları buraxmırlar. Gündüz burda qalmaq kişilərə qadınlardan 2 dəfə bahadır, 100 dollara. Gecənin ləzzəti isə hamıya 75 dollara başa gəlir.
Söhbət istirahətdən düşmüş, Ficidə mehmanxana var ki, 15 metr dərinliyində suyun altundadır. Otaqlar kapsul şəklindədir və ümumi boruya bərkidilir. Amma lazım gələrsə idarə pultunda düyməni basmaqla kapsul hava qovuq kimi suyun üzünə çıxa bilər. Burda qalmağın əsas ləzzəti balıq kimi suyun altında olub ətrafdakı balıqları yemləmək imkanıdır. Bu ləzətin qiyməti həftəsi 30 min dollardır. Kiməsə bu baha gəldisə gedib Braziliyadakı ağac üstündəki mezmanxanada qalsın, cəmi 484 - 1260 dollara. Tropik meşədə dırmaşsın ağaca və Tarzanın çıxardığı səsi imitasiya etməyə çalışsın. Mehmanxananın sahibi buranı tikməzdən əvvəl qarşısına tropik meşəni qorumaq məqsədi qoymuşdu. Amma nəticədə ideyası ona savab yox, pul gətirdi.
Belə getsə istirahəti heç yerdə tapa bilməycəyəm. Siçan kimi barabanı elə evimdə də havayı fırladıram. Ağaca dırmaşmağım gəlsə şəhərin hələ ki, duruş gətirmiş budaqlarına pənah apararam. Kanalizasiya üçün isə heç darıxmayacam, onsuz da qoxusu burnumuzdan çəkilmir. Qəribədi, kimsə buna görə pul verib ləzzət alır?!